3月3日 星期四
尋日大少終於都收到果個地盤車司機嘅賠償, 可以話了咗件事, 成件事都有驚無險. 另外, 相信係香港人都好開心, 無啦啦多咗$6000蚊, 我地已經諗好點洗了, 就係用嚟交保險費.
畢業出嚟社會做野之後都買咗兩份供款嘅儲蓄保險, 其中一份仲有年多就供滿. 當時係幫一個大學同學仔買. 但係佢做咗一兩年就無做, 轉咗俾第二個agent. 轉吓轉吓, 我已經唔知究竟邊個 agent 跟我個case.
而家有咗兔寶寶, 預計我响未來呢一兩年都唔會出嚟工作. 無入息, 無收入, 供款嘅責任就落咗响大少度喇~ 於是今日兩點鐘就約咗個agent出嚟, 講解吓俾大少知份保單嘅內容.
今日都係我第一次見個agent, 佢年紀都應該有三,四十嵗, 個樣都幾老實. 而且我地去到麥當奴嘅時候佢已經到咗好耐, 仲搵好位.....
讚呀!!之前我仲同大少講, 千其唔好俾佢sell到買保險, 因為我預計佢會sell 我買D儲蓄俾BB將來用嘅plan.但個agent竟然無sell, 攪到我都唔好意思問....
傾完一輪已經三點, 我又唔多肚餓, 於是陪大少去"沾仔記"度食野.....平時食麥皮做早餐果陣又唔見大少咁肚餓....佢食咗一碗雲吞河+一碗淨雲吞!!
我就"痴"咗佢一粒雲吞食.之 後我地諗住返屋企攤透吓, 經過小食店我想食豆腐花...呢間鋪D野好平, 今時今日仲有5蚊大大碗豆腐花....為食嘅大少見到人地鋪頭牆上面果D餐牌, 忍唔住叫咗淨牛腩 + 豬紅 + 冬菇....都係十三蚊..........大少話見到個個入嚟都食豬紅喎....幾好吖....呢個藉口~~~~
返到屋企樓下, 先發現層樓唯一一部升降機做緊定期檢查! 我地搬咗入嚟先為意到呢度得一部lift! 而且呢度個業主立案法團好重視架lift嘅保養, 每兩星期一次! 我每次都唔記得mark底維修嘅日子!
如果我一個人, 我一定會選擇'young' 上去囉~ 話就話我地住11樓, 扣咗四樓同十四樓其實不過得九層, 況且我以前係住唐樓大嫁! 但大少就怕我大住個肚支持唔住... 於是我地又去咗屋企附近一間幾好坐嘅餐廳等有lift喇~
叫咗個炸雞脾沙律share食. 大少掛住玩 i-phone, 要我餵佢.........之後返到屋企佢同我講, 覺得自己好似一個細路咁喎.....
大少其實你好多時都好可愛嫁!!
今日成日都好似係食食食咁呀~
沒有留言:
張貼留言