星期日的晚上.....
好開心, 聽日大少放假...
晚上十黠幾, 大少提早收工, 先陪我到沙田嘅"陳根記"食飯, 剛剛踏上十時後消夜特價時段, 碟碟三十三蚊~
叫咗:
芝士豬扒
椒鹽牛柳
琵琶豆腐
菜心炒牛肉
椒鹽九吐魚.....................好難食呀!!!!!!!!!
呢 間大排檔我去過三次, 第一次唔係响消夜時段幫親, 就覺得好好食; 上次同今次, 食物質素麻麻地, 得個平字. 同埋因為夜咗嘅關係, 好多我地想食嘅野都賣晒. 仲有好多人煲煙囉..............都唔明, 成五十幾蚊包煙, D人仲食得落嘅..........我估我地以後除非經開, 唔係都唔會再磚燈揸車去食Lu...
之後响沙田返屋企, 有我地嘅餘慶節目...
影得好黑呀...........
因為真係好黑囉! 估吓呢度邊度嚟?
HeHe....
馬騮山嚟嫁......
一隻隻果D咪係馬騮囉~
平時夜咗D馬騮瞓晒覺, 唔會走落嚟嫁, 要搵D食物撩佢地, 先會撩到幾隻肚餓想食消夜而又大膽嘅走落嚟.
今次咁啱有另一架車响我地嚟之前到達, 佢地準備咗好多切咗粒嘅香蕉,蘋果等生果, 一大袋一大袋咁餵D馬騮.....所以好多吸引咗好多馬騮從樹上落晒嚟.
我地都預備咗D花生, 瓜子等食物....D馬騮好聰明, 識得自己剝花生殼, 蕉皮同搣糖紙嫁.......
而餵佢地多次之後, 我發現原來佢地最鍾意食嘅, 唔係花生同蕉, 而係蛋糕同糖呀~~~
不過呢個餘慶節目都幾高風險, 因為餵飼野生馬騮, 最高罰款係一萬五千蚊呀..........
************************************************************************
2月28日 星期一
大少放假呀......
瞓醒已經係下午茶時間Lu.......
先去尖沙咀樂道果間Big John度食下午茶.....呢間野我食咗好多年, 我覺得D食物唔錯嫁!
係地方細D, 迫D; 遲D帶住兔寶寶就難D嚟呢度食Lu....
我食咗:
淨香茜牛肉餃配蕃茄素菜湯底
個湯底好好味嫁, 我幾鍾意食呢度D魚蓉餃子同牛肉餃子....成碗連湯都飲埋...
唔要飲品可以轉湯或者甜品. 佢D湯好足料, 好似無味精, 所以好快賣晒, 今日甜品係椰什西米露:
仲有個小食, 好多選擇, 我簡咗格仔餅:
佢地會俾個牌你, 等你食完晒D野先攞, 保証你食果時係熱辣辣嫁! 呢D咪有 Heart囉!
大少呢個食肉獸, 叫咗炸豬扒鬆餅同凍咖啡....
大少第一次叫呢個餐, 佢平時叫炸豬扒沙律嫁!
佢話以為係兩大塊豬扒, 加一舊仔鬆餅...點知嚟到得半塊豬扒!
大少緊係失望同唔夠被啦~
食完佢問店員單買一塊豬扒幾錢...個店員見我地叫咗一個麵餐(即係淨餃子餐), 話加多幾蚊(幾多蚊?! 唔記得咗~
)就可以要多一塊...大少開心到..........
抵我地搭的士嚟食嫁~
之後又去咗護協, 換返上次買果Set奶瓶, 大少話唔好用膠喎~ 咁就換咗四個玻璃奶瓶...同埋買咗set床上用品, 係Winnie the Pooh嫁, 四百幾蚊, 同一套永安賣緊五百幾呢~
我放棄咗套hello kitty 了, 因為一套Hello Kitty 差唔多可以買兩套 Winnie the pooh.....
同埋BB D 床上用品價錢仲貴過大人, 等兔寶寶大個女真係鍾意Hello Kitty 先買俾佢啦...
其實我細個都唔鍾意Hello Kitty, 我鍾意叮噹嫁...大咗先鍾意Monchichi....
之後又去咗康嬰之城度睇野, 不過無野買到.
到六點左右, 就行咗去花園街, 因為網上話果度D BB 野平喎~ 去到真係好多小販檔賣BB衫仔, 不過大少話D質地唔好, 同埋我好怕俾D小販呃, 所以只係買咗呢件:
Heehee.......幾時兔寶寶識講呢句說話呢?!
個小販叫我買埋"I love Dad" 果件嫁...大少衰衰咁話肉麻唔要喎, 咁我咪唔買LAW...
佢一路俾錢一路伊伊哦哦, 話: 唔洗I love Dad 嫁喇! 整係知Daddy俾錢咪得Law...
兔寶寶, 你Daddy咁快就呷醋呀~
仲有買咗對襪仔:
係咁多...
行返去旺角都九點幾Lu...於是去咗創興間德興打邊爐, 掛住食整係影咗個鍋:
呢個係我地去德興最鍾意嘅鍋底: 冬陰公
兩條友飲食連埋竹庶水/酸梅湯任飲, 加埋一埋單$196蚊....大少食咗超多碟帶子, 我就食咗超多花膠仔同炸魚肚...........真係超抵呀......
不過我對腳, 由下晝三點幾四點行到夜晚九點半..真係坐底咗唔識企返起身呀~ 係我第一次感受到, 陀住BB D 腳骨力真係差D嫁~ 返到屋企, 大少幫我按摩雙腳, 晚上瞓覺先無抽筋咋~ 謝謝大少........
沒有留言:
張貼留言