尋晚成晚都瞓唔著(可能因為瞓咗兩個鐘頭晏覺嘅關係), 個肚唔係咁舒服,...今朝成八點瞓, 下午一點幾就醒了.......
大少見我咁早醒, 就問我去唔去飲茶......
但之前一日佢同我講過今日想起身後去做gym.....我知佢係怕我悶, 所以先問我; 我唔想成日side錢出去食野囉~ 而且今日三點到四點會有升降機維修, 我唔想飲完茶又未返得屋企, 半天吊唔知去邊咁.....
所以我同大少講: 你不如當我未瞓醒啦!!
我真係唔想大少因為我而無晒D私人時間, 成日因為要陪我而做唔到自己想做嘅野.....
大少今日好乖, 做完gym都返屋企食晏, 無响出面亂食野....不過要求我煮公仔麵 + 腸仔囉!!!
之後大少返工lu.........無做野之後, 對我嚟講一日之中最眼瞓其實係晚上6點至8點, 特別係而家電視無野好睇....不過我唔敢瞓呀.......唔係今晚又瞓唔著啦~~
到深夜一點幾, 大少返嚟食消夜喇~~
今晚煮咗:
蒜茸炒魚片雜菜(椰菜, 金菇, 翠玉瓜)..........upload咗先知幅相咁濛tim~
焗鹽焗雞翼.......
奇異果..........
兩個月前大少响惠康買嘅奇異果, 最奇異嘅地方係放左兩個月都唔爛! 買嘅時候係好硬嘅,而家先軟軟地! 大少由初初隔兩日就問我D奇異果食得未, 到而家佢見到都當咗係屋企擺設嘅一部份! 買咗5個, 之前批咗兩個睇吓, 都係酸到阿媽都唔認得
.....我已經無心機等佢變熟...... 今日批多兩個,一食就知大少實唔會吼, 於是自己吞咗去(無錯, 係吞, 唔係食), 當補充D維他命C啦~雞翼同菜, 大少食晒, 仲唔夠飽要摷餅乾食tim~ 前兩日俾我發現大少食唔晒D麵同菜(肉類食晒), 偷偷地倒咗去....
佢又倒得太有公德心, 唔倒落廁所, 而搵個垃圾袋包住放入垃圾桶........
結果緊係俾我發現兼剷到佢飛天啦!!! 佢先同我講話返屋企前飲咗夜茶......
就因為咁, 呢兩日我都特登問佢肚唔肚餓, 又煮小D野俾佢..... 我真係唔想佢side咗D食物同埋我D心機呀......雖然我唔係煮九大簋姐....
仲有我俾D顏色佢睇吓, 想佢知千其唔好得罪廚房煮飯果個! 佢唔夠飽就會知驚唔敢side野, 特別係我煮嘅野..........但係見到大少做野已經咁辛苦, 返到嚟仲要唔夠飽食餅乾...好似好陰公咁......我就忍唔住同大少講: 唔夠飽雪櫃仲有雪米磁呀~~~
沒有留言:
張貼留言