閒逛皇室堡

5月26日  星期一  晴天

兔寶寶好快就讀K1, 

小朋友好快長大, 

遲下要默書考試測驗呢樣果樣, 

想盡情玩, 就要把握現在!

希望每個週日都係晴天, 可以帶佢出去玩~

等咗好耐, 終於星期日係好天.

上午見住呀B食晒一大碗飯, 

唔等大少起身就出發, 

兩母女去玩, 想去邊就去邊, 

都幾開心~

呢日好熱呀, 我地無行過去, 

搭叮叮..

其實無諗過去邊度玩, 但真係太熱, 

就去皇室堡行吓啦~

行到過去, 更加覺得決定正確.

Hello Kitty仲响度呀~

 

只要在商場內作任何電子消費就可以免費玩充氣蛋糕一次.

咁我地就走咗落樓下超市買支飲品.

幾蚊雞可以跳五分鐘, 

抵玩過去冒險樂園好多!

拎張單出嚟就可以登記排隊玩!

星期日都唔多人玩喎, 

可能人人都以為要買好多野先可以玩!

我地只係等玩緊嘅小朋友玩完果round出來就可以玩!

等待中的兔寶寶有點好奇又有點心急.

好記得上次去灣仔嘉年華, 

排到嘅時候呀B竟然臨陣縮砂!

所以今次我都有定少少心理準備...佢會縮!

肯主動除鞋已經有進步喇~

今次開頭得唔太好, 

是我太過心急, 一抱就抱咗上去, 

响佢企都未企得隱嘅時候就放咗手!

加上著咗襪仔比較跣腳, 

佢就C都企响門口扶住個邊唔肯行入去!

好在職員見佢年紀較少先由得佢咋~

跳多兩跳企唔隠, 

要我响旁邊扶住, 

所以影唔到相.

如果佢唔驚的話, 咁樣跳跳跳係啱晒兔寶寶的.

玩完就上去行Toysrus, 

見到味精拉麵個公仔, 

兔寶寶走埋去要share食~

响呢樹一定玩得耐啦~

玩到咁上下, 

有人話要VV喎~

皇室堡嘅廁所超多人排隊.

做呀媽嘅懶醒目, 帶佢入咗去九曲十三灣嘅IKEA, 

貪佢果度有小朋友座廁...(大前題係, 我知佢好忍得!)

好衰唔衰個廁所係無廁所板嘅, 

隔離大人果D, 都係無廁板.

唔係有個女, 

我都唔會發現IKEA嘅女廁係拆晒所有廁所板嘅...

 預得出嚟行幾個鐘, 

我無理由帶埋塊私伙廁板出嚟架?!

好彩同呀女後尾肯响條片度去咋~

去唔成廁所, 就响IKEA行吓玩吓~

錯有錯著, 

咁啱肚餓, 可以買隻熱狗汽水雪糕充吓飢~

最後响惠X買埋餸先返屋企.

由中午十二點玩到五點幾先歸家, 

有得行有得玩有得食, 

精力耗盡, 但所費無幾~