語言發展評估報告

12月6日  星期六  晴天

前篇提過週三那天帶了兔寶寶去健康院做語言發展評估.

兔寶寶到目前為止仲係好多bb話,

雖懂得說單字和詞語, 但發音怪怪的, 

像說英文般, 音調不大正確.

以她的年齡來說應該懂得說句子, 即是動詞+名詞,

但做評估之前,見到人打籃球, 她仍只會說"波波", 

是最近才懂得說打球、除鞋、著衫呢D日常生活常用到的字.

隨著兔寶寶長大, 愈來愈多人都會問我點解呀b仲未識講野..

 

除了語言發展, 呀b好像對其他小朋友不太有興趣,

除非有人很主動撩佢玩, 否則佢寧願睇人玩都唔參與.

所以我都有擔心過佢係咪有自閉症呢?!

因為在協康會上興趣班,同那兒的負責導師傾過, 

佢覺得兔寶寶說話能力較慢,

還有很慢熱、怕羞, 但不似自閉症的徵狀.

雖然有可能是因為呀b參加其中的一個興趣小組是家長不能參與的.

她建議我先到健康院見醫生, 才作進一步的行動(例如搵語言冶療師幫手).

去健康院搵醫生做評估呢, 都唔係話想做就做.

先要見姑娘, 姑娘覺得"有需要"才行.

其實兔寶寶早於兩嵗時已經見過健康院的姑娘, 

都唔知係好彩定唔好彩, 當時姑娘就係覺得無需要.

到現在兩嵗半, 再排期一次.

今次終於"得嚐所願"過唔到姑娘果關, 要去見醫生做詳細評估報告喇~

唔係話想兔寶寶唔正常,

而係我覺得小朋友如果有事, 家長應該愈早知愈好.

如果唔係坊間的言語冶療收費高昂, 大少又唔認為兔寶寶同其他小朋友有所不同的話, 

我早就帶呀b花數千元出去做評估了.

好喇, 講返週一嘅評估.

當日兔寶寶都係如常講bb話多過人話,

做一些測試中醫生都無特別要求過兔寶寶說話,

都係要佢指答案出來多, 又花了一些時間同佢玩.

整個過程大約一小時, 

一面做個醫生一面同我傾~

因為時間充足, 我連呀b把"sir滑梯"說成"sir梯"都講埋出嚟.

大話夾好彩, 兔寶寶就係呢幾日開始識得講小小動詞+名詞嘅句子, 

"玩波波池"更係常掛在口邊, 所以醫生一聽到佢講呢句, 

已經斷定佢無問題了.

而其他發展方面, 例如自閉症呀、慢熱內向呀呢D我都問埋醫生.

佢話同兔寶寶玩咗陣呀B已經很懂得同佢玩, 

雖然唔係一見到人就即刻攬埋嚟果種, 

但未到去慢熱內向嘅情度.

大少小時候痴脷筋要動手術糾正, 順道問埋醫生,

兔寶寶說話不清, 是痴脷筋嗎?

醫生叫呀B伸條脷出來看看...

她看一看, 說: "條脷咁鬼長, 點會係痴脷筋姐?!

痴脷筋D人係伸唔長條脷架!"

她還說假使兔寶寶到四嵗時仍說話不清才要做語言冶療, 

現在咁細個做係無意思的.

我又問佢, 咁樣成日自言自語講BB話, 正常嗎?!

個醫生同我開始傾得熟, 就話佢宜家兩嵗半咁講BB話係正常嘅, 

假如到四嵗仍然係好多BB話就唔正常喇~

 

最後係終結報告結果嘅時間, 醫生話兔寶寶正常過唔正常,

認知能力甚至去到三嵗小孩水平,

只是語言發展比現在的小孩遲了少許.

她特別強調了"現在"兩個字, 解釋說是近年的家長把小孩逼得太緊, 

忘記了兩嵗半仍然是BB, 很多地方的小孩其實是到三至五嵗才入學的.

她提醒我要小朋友語言有進步, 千萬不要逼佢講, 

佢唔鍾意講就由得佢唔好講, 由家長負責講.(個醫生笑說叫我好似傻婆咁係咁講野就得喇~)

也不用故意講慢些俾佢睇口型要佢講, 

只要個家長同小朋友都係正常的話, 

到個細路會講嘅時候就自然會講.

你逼佢講呢?! 小朋友會自己知自己仲未講到,

不單會反感, 甚至打擊佢自信心.

要是你真係要教佢講野呢, 講一次佢唔跟住講就算喇, 

唔好逼佢.

呢樣野係我之前犯嘅錯誤, 常常都威逼利誘兔寶寶講野.

個醫生都有讚我架!

佢讚我常常同兔寶寶玩埋D無聊野很好(佢之前問我同呀B玩乜野多, 

我話有教育義意嘅野唔多, 成日都係玩埋D無聊野, 攬身攬勢走來走去你追我遂果D,

因為我鍾意見到BB哈哈笑個樣),

佢話咁細嘅小朋友係極需要玩無聊野的, 

玩得愈多愈好, 唔需要咁快教佢野.

可能很多現代家長會反對, 

但諗真一層又係嘅,宜家細細個唔無聊, 

唔通大個先走嚟無聊好咩?!

醫生聽到我一星期帶兔寶寶上數堂playgroup,

又提醒我playgroup也是無必要的, 

要學同人溝通可以去公園學, 

公園裡的孩子有大有細先至係真實社會嘅環境,

playgroup果D係把差不多年紀的group埋一齊去玩,

同幼兒班不同的是家長也參與,

做家長的很自然就會拿自己的孩子跟其他小朋友比較, 

咁樣對小朋友都唔係好.

她再三提醒我要常常讚美小朋友,

最好讚30次才話佢一次, 

咁樣佢先會進步得快.

聽到呢份報告我個心都安樂晒,

更開心的應該是大少, 

之前我花了不少金錢在playgroup上, 

心理上是彌補呀B無N班讀(唔係大人要搬屋, 小朋友都唔會無書讀啦!)

聽完個醫生咁講,返埋已經報咗嘅playgroup,

以後都只會幫兔寶寶報興趣班了. 

之後都無再逼兔寶寶講野, 

唔知係咁啱得咁Q定係點, 

呀B真係講多咗野, 

識講"買俾我"、"哥哥打(籃)球"、"我食奶奶"、"俾返我"呢d.

對我來說, 是突飛猛進了.