3月25日 兔寶寶36週了

3月25日  星期五  晴天

兔寶寶36週了

兔 寶寶仲有一個星期, 就足月喇....不過兔寶寶咁細粒, 都係响媽咪肚入面住耐D好...其實我都好矛盾,  本身我都係一個唔吸收嘅人, 怕佢住耐D反而對佢唔好, 可能佢出世後食奶會好D...又驚胎水不足佢會缺氧....我而家唯有安慰自己, 情況都唔係好嚴重姐...否則醫院都唔會俾我出院啦~~  (發揮阿Q中....)

今朝9:15就返咗QE睇內科了...磅重時重咗D呀....有55.2kg了...超過120磅呢~~ 不過內科磅重又唔洗除鞋除外套... 點都好, 都算是重咗了...

今朝可能早啦...唔洗等好耐, 好快就見醫生...又係另一個我未見過的, 次次睇內科都係見唔同醫生... 政府醫院係咁嫁喇~

首先我緊係問佢前兩日抽血驗甲狀腺素嘅結果啦...佢話仍然係低呀.....雖然唔係低好多, 都仲係要加重D藥, 每日要食100mg 嘅甲狀腺素, 比起最初食多一倍份量呢~

佢又質疑我有無食晒D藥?!

大佬呀, 我睇醫生唔食藥我做咩每兩個星期晨咁早仆嚟仲要等餐死去見你?
雖然, 我知個醫生好可能係隨口up, 但果刻我覺得佢有小小問都多餘囉~~

我跟住問佢, 咁其實我需要介口嗎? 因為我攪唔清究竟係甲亢定係甲狀腺功能低下係唔可以食紫菜同海產, 每次覆診都唔記得問, 所以我都盡量唔食. 個醫生話唔需要介口喎~~

之後我問佢: 我有D傷風呀~ 可以幫我睇埋嗎? 點知, 佢話: 呢D我地專科唔睇嫁!!

洗唔洗咁按章工作呀~~

星 期二, 我開始有D喉嚨痕同鼻塞, 唔係太嚴重, 所以果日見醫生都無同佢講. 星期三返去檢查太多野要做, 又太擔心兔寶寶都唔記得講...呢兩日都食咗上次去睇C+剩低嘅大肚感冒藥, 但D傷風一路都唔見好過. 今個星期已經見咗三日醫生, 仲要出去C+睇傷風感冒...真係攪野兼誇張呀... 今日呢個醫生實在太太太過份喇!!!!!!!

佢叫我兩個星期後返去覆診, 俾張藥紙我, 就攀我走喇...都唔係好似之前D醫生咁, 問吓我食咗D藥有無唔舒服呀? 有無手震呀? 有無胃口食野呀? 有無心跳加速呀? ......

佢咁"求其", 怪不得睇得咁快啦.....

連埋攞藥, 一個鐘唔洗就走得lu...