私人畫展

3月31日  星期一  陰天

好耐無出blog了...

懶並不是一個原因.

當人人都在追韓劇時, 

我就在夜深人靜之際煲小說...

在十幾嵗時睇過一次金庸全套武俠小說,

廿幾嵗時再睇, 

到現在三十幾才又再番睇, 

愈睇愈只有覺得愈好睇;

希望嚟梗每十年都仲有精神再睇一次啦~

三月過咗, 

兔寶寶嘅playgroup出了一張成績表, 

由老師總結過去一個月嘅表現.

 

總括來講, 老師嘅評語都是十分正面的.

一來呀B唔係一個攪事嘅小朋友, 

二來係上堂時佢十分專注.

上咗一個月, 佢D語言能力明顯地進步了,

一入到學校就識自己轉channel講英文!

我在課室外"裝"佢上堂, 

就發現佢嘅表現比响屋企還要乖!

平時要佢做D野, 

有時都要扭吓擰吓先肯, 

但在課室就好主動.

同埋平時都會同哥哥仔爭吓野, 

响課室就完全無喎!

原來小朋友年紀小小已經識得走雙面!

 

 嚟緊四月因為有復活假, 

加埋我同兔寶寶新曆農曆生日, 

又會去吓旅行咁, 

會暫停playgroup一個月,

到五月至七月再返過.

上咗短短一個月, 

屋企貼滿了大大小小勞作~

果兩舊貼咗棉花嘅唔係jelly-fish, 

老師話係rainbow來的.

只係老師話呀B貼第一條紙時要pink, 

第二條又係pink, 第三條都係要pink囉~~

間學校有無heart真係好易睇,

之前上咗某音樂班有幾個月, 

除咗學do ri me之外, 

堂堂都係學果D野!

無勞作, 只有俾個英文字你填色!

最後, 想讀埋唔讀都唔得, 

果間學校會响四月執笠, 

好彩佢退返學費俾我咋!

黑白月亮, 

老師大讚兔寶寶可以坐定定好耐做勞作架!

我覺得佢都有少少完美主義, 

好似刷牙刷到有小小咀邊, 佢都要即刻抺咗先再刷,

明顯同我男人婆性格好唔同!

呢幾張係再之前同佢報塗鴉班嘅印畫.

復活蛋都有.

仲有扇同搖鈴.

 Melody同雀巢都有!

個雀巢本來有兩粒朱古力蛋架, 

不過家有為食B, 擺唔到復活節LU!

而個Melody呢?!

兔寶寶應該有份畫上眼睛和咀巴, 掛?!