放假一天 + 嫲嫲自煮魚蝦蟹

3月20日 星期四  晴天

星期三大少放假, 

同前幾個星期一樣, 

等兔寶寶上完playgroup去北角食上海野~

今次D鱔糊又係無我份!

大少今次叫了酸辣湯麵 + 鹵牛展下午茶餐.

食完個TEA, 兔寶寶已經急急腳引領我地去玩波波池.

因為要返學無咗好多時間, 

無買全日任玩飛俾佢, 

只係俾佢玩一陣同玩埋Thomas小火車~

 

嘻嘻, 我地都有去食豆腐花架!

一去北角就勁多野想食, 

幾鍾意呢區好多唔同類型而且平靚正嘅小食肆, 

屯門都無佢咁多!

 但呢日我地唔可以食太多野, 

因為呀嫲煮咗好多好野食!

*************

上到去呀嫲仲未煮好, 

大少就同個女上you tube睇人跳芭蕾舞.

 兩父女影幅相啦~

同媽咪影, 嗲幾多!

開飯喇~

 有灼海蝦

薑蔥炒蟹

椰菜花煮魚蛋

清炒小唐菜

煎黃花魚

豆卜炆五花腩

呢碟係得我夾過兩塊豆卜咋, 

太多餸, 無人陏過~

仲有蒸鮑魚!

係兩碟!

總共20隻, 四個大人各分得五隻!

呢餐大家對手同個咀都好唔得閒, 

忙著食又忙著搣蝦拆蟹...

不過最唔得閒果個係大少, 

兔寶寶自開始佢每日兩小時嘅playgroup生涯後, 

由本來戒咗午睡而變返去要瞓陣晏覺.

但呢日掛住玩, 無瞓過;

大人食飯時佢就開始扭眼瞓~

諗住佢瞓著咗抱佢上床, 

點知佢即刻扎醒爆喊!

兔寶寶你唔好諗住DADDY會同你抱足全程先得架, 

美食當前呀囡都無情講!

 好彩日頭襯佢兩父女玩波波池時我行咗出去百佳逛咗個圈, 

見米奇老鼠蛋特價買咗盒咋!

咁先引到呀囡肯行返去自己位度食!

飯後仲有節目,

幫呀嫲痴印花.

佢痴得好仔細, 張張都要唔出界;

一出界就自己搣返出來再痴過.

佢做野好明顯認真過我好多!