團年飯 @ 屯門

一月九日  星期四  晴天

尋日入咗屯門, 

提早同娘家食團年飯.

未食晚餐, 先食個LUNCH.

去返上次果間上海小店.

我要咸豆漿餈飯下午茶.

大少要了酸辣獅子頭米線配熱豆漿, 

獅子頭只有兩粒,似肉丸多些, 

兔寶寶還要吃了一粒.

大少唔夠肉食, 

之後又散叫多一塊上海排骨,

而我就另外叫多碗豆腐花.

兔寶寶, 肉丸好無食呀?!

洗唔洗連碟都LAM埋?!

連我碗豆腐花都要抽下水...

***********

食完飯, 走咗入惠康買野...

都話兔寶寶發錢寒架啦, 

見到舊朱古力金元寶就拎住唔肯放手.

咁就買埋佢, 俾呀媽新年放响生果籃.

 

去到婆婆屋企都係要揸住舊金响手.

俾呀公捉實都唔願放手...

****************

之後由婆婆帶去冒險樂園玩,

俾我地兩個大人去買野...

 

玩吓玩吓, 熱到連件裇衫都除埋...

玩完波波池, 又未到食晚飯時間.

在商場流連時婆婆買了一玩具眼鏡給兔寶寶.

以後睇Wiggles 的MTV就可以跟著一起跳 " I've got my glasses on"了.

上到酒樓已經七點九, 

兔寶寶慣了早吃飯, 

加上玩完一大輪, 一坐低即不停吃花生.

呢晚响富臨訂咗位, 

無叫餐, 全部散叫.

糯米飯竟然最早上枱.

咁早食團年飯, 雖然人客不多, 

但侍應全部都好忙咁;

野食都係麻麻地.

飯後經新商場行去巴士站...

全日都很開心...

就是等車返屋企時有人痾C唔出, 

要佢行返上商場又唔肯, 要企响度等到痾出為止.
(估計佢係唔想响條片度痾, 但又急得很不能"遷移玉步"所以哭)

結果由呀婆做衰人, 一有車就抱佢上車.

大少就醒呢, 有咁遠坐咁遠..

難為我成程車抱著個臭寶寶~~~ 
金元寶又無我份, 送一大泡黃金俾我, 
真係吖~~~