打退堂鼓

10月22日  星期二  晴天

星期日無煮晏晝飯, 

去咗大快活食下午茶.

食完就一齊走去街市行吓,

打算買D吹哨子嘅玩具俾兔寶寶訓練口肌.

灣仔街市賣玩具同文具真係好平,

仲平過屯門同油麻地, 所以每次經過都忍唔住買返D.

例如十蚊有三本貼紙薄或填色薄,

咩公仔都有, 當然唔係正牌啦,

但俾細路仔玩就唔理得咁多.

到黃昏時段, 同兔寶寶去修頓附近攞D野,

經過時見到球場有嘉年華會,

攞完野就走入去行吓.

呢D大型充氣玩具, 

係俾小朋友免費走入去跳架!

因為就快天黑唔多洗排隊, 就諗住俾兔寶寶玩吓啦!

唔知呀B係唔滿意我除佢對鞋定係太細膽喇, 

佢竟然打退堂鼓唔敢玩!

只不過係跳跳跳姐, 唔洗咁驚青呀嘛?!

C啦, 如果樣樣野都要我陪住先敢玩,

咁就乜都唔洗玩喇~

 

唔跳充氣玩具, 

我地就排隊拎爆谷食.

仲有棉花糖添, 都係免費架!

不過兔寶寶都唔食棉花糖, 

就費事排喇~

一路食住爆谷, 一路睇表演...

睇完都天黑喇!

臨返屋企又走入熊貓店度"巡鋪".

係呀, 自從呢間鋪頭响屋企樓下開咗,

兔寶寶每次落街/返家, 

都要巡一巡鋪先安樂架!

幸好所有店員都歡迎呢位走入來運吉嘅小顧客.

沖完涼就開盒A貨Barbie出來玩,

不過佢唔係幫個公主換衫/梳頭,

而係不斷將D衫放好入衣櫃/行李箱又攞返出來...

收好D衫前要我幫佢每件摺好,

拎出來又"陽"散佢,

真係搵呀媽笨.