丟彩虹

10月18日  星期五  微涼

前日大少放假, 

兔寶寶同我一早六點就起咗身,

响屋企食完早餐玩咗陣, 

見大少無咁早起身就走落街逛一逛...

去到樓下office同姐姐們打個招呼.

呢幅相, 姐姐唔係迫兔寶寶發毒誓, 

而係教緊呀B豎起兩隻手指做"二"嘅手勢...

點知原來用手指做"V"字對兔寶寶來講係好難控制的,

做到佢有D唔耐煩...

  姐姐一鬆手,即刻輕鬆晒..

拖住兔寶寶四圍行咗陣, 

返屋企食D野後就再瞓過.

瞓醒已經下午兩點喇!

大少早就準備好去食午餐, 我帶佢去咗新森林,

去到剛好兩點半有下午茶.

我叫一個飯餐, 跟飲品,

再加三蚊就有湯同蒜蓉包.

飯餐可以跟一客小吃.

要了麥樂雞, 預兔寶寶食.

本來係雞扒吉烈蝦煎蛋飯配日式汁 , 

怕個日式汁係酸酸地果D, 就加兩蚊轉咖哩汁.

呢個餐唔要湯的話只係廿九蚊!

大少就要豬軟骨拉麵跟咖啡.

食完野就急急腳行去皇室堡, 

兌現返之前話帶呀B去冒險樂園嘅承諾.

兔寶寶好好記性, 行到去附近已經猛咁叫"bus"...

不過今次睇真咗D, 地下係有路軌嘅, 

呢架唔係巴士,  係火車先啱..

呢日呀B終於肯"出車"行去鬼太郎度影相, 

唔係好似上次咁, 痴住架車唔肯走了.

**************************

皇室堡間冒險樂園, 

其實啱C奶玩多過小朋友玩!

裡面有好多零技巧純賭博嘅遊戲,

太太們一袋袋金幣咁入落去...

只得兩架電動車, 假日來可能要排餐C!

 

睇圖...覺唔覺得大少玩得仲開心過兔寶寶?!

 拎咗三十個金幣, 玩剩兩個, 

用來丟彩虹, 俾我中咗三獎!

係本人玩得最成功嘅一次喇!

可以換一隻小公仔或100張飛, 

我就選100張飛...

影相留念時幻想自己中咗一百萬, so happy~~~

為咗慶祝今日嘅"成就", 

大少仲買咗支棉花糖我食添!

點知原來兔寶寶係唔食棉花糖嘅, 

大少又唔肯食, 自己一個啃完一大支糖, 

食完個口都有少少損損地...