兔寶寶瞓咗覺, 又係我自由活動嘅時間!!!
尋日講完呀虎咁勞氣, 今日要為自己增加D正能量!!
呢個星期我好勤力呀, 幾乎日日都有準備晏晝俾大少, 無出去飲茶真係慳唔少呀!!
不過兔寶寶就慘D, 幾乎成個星期都無出街!!!
街市附近有一檔專賣生餃子嘅店,
成個檔口咁大, 只係賣四樣野: 菜肉餃, 韮菜餃, 芹菜餃同埋鮮蝦雲吞...
冬天嘅時侯D人買嚟打邊爐, 好快賣晒, 亦都好快收檔架!!
星期二買咗菜肉餃:
大少問我D餃子响邊度買架?
我吹水話係我自己包架!!
大少再追問, 我打死都話係自己包....
佢無我咁好氣, 話: "咁你下次包多幾隻啦吓!!"
於是第二日, 我又"包"餃子喇!
今次"包"韮菜餃.
大少唔客氣食晒20隻,
一隻都無留俾我...
吓!! 邊個話自己晏晝無胃口食野嫁?!!!
某日我嘅小點, 鹼水糉一隻:
加埋大量糖漿, 正呀!!
唔識煮野食, 唔行街市嘅人有一個可愛之處,
就係你整小小野食, 佢會以為好複雜好難整,
之後就好感動...
呢碟雞絲海蜇, 只係剪開一包即食海蜇,
同埋蒸熟一舊雞胸肉擦C,
搵麻油撈兩撈;
大少就即刻對我另眼相看, 以為我廚神上身添呀!!
終於嚟到主題喇!!
尋日去咗一間叫"安格斯"嘅凍肉鋪,
果度有得散買Mozzarella cheese, 18蚊有200grams;
下晏整咗火腿pizza:
仲有吞拿魚pizza...
好好味呀! 又易整喎!
可惜我用咗本來用來早餐時搽花生醬吃的提子飽,
個邊比較易燶, 下次買返白方包就無問題了...
仲買咗一包安格斯漢堡扒:
就咁煎熟就食得,
啖啖肉大少緊係啱啦!!
煎咗兩塊, 叫大少留半塊俾我,
點知佢食剩一口, 話果度有半塊喎!!
我覺得似triple O 果D漢堡呀!
大少見我煮咗咁多餐, 話要獎勵我喎!!
走咗落街買四桶雪糕返上嚟.
有兩盒牛奶公司, 同埋兩盒大少鍾意食嘅 Dryers....
咪住先!
D雪糕係獎勵我, 定係買嚟孝敬自己架?!
好dry呀, 飲啖coke先啦!!!
沒有留言:
張貼留言