至從兔寶寶學懂由床上自己爬起身企响張床開始,
每一晚要佢瞓覺就無以前咁輕易喇!
而且佢愈來愈瞓得少.
每晚十一點左右我都會熄燈關門等佢瞓,
佢不停响張床度爬起身企响度大聲嗌撩人玩,
唔理佢就大喊, 喊到又咳又俗親咁,
唔知佢扮野定係乜,
總之我要起身開燈出去睇下佢有無事.
好不容易呵到佢平靜甚至瞓著呢, 跟住一放落床又醒...
成晚就不停重覆, 就咁磨吓磨下成兩三點先捨得瞓.
第二朝一大早佢又起咗身喎~
佢晏晝都唔係瞓得多架,
都係一個鐘左右,
唔係見佢晚上瞓得少我根本唔想俾佢瞓晏覺,
驚佢瞓埋晚上瞓得更少.
計埋佢每日瞓得比好多成年人還要少.
我諗係時候要買保嬰丹俾佢食了.
尋日佢一早六點幾又醒咗,
睇佢個樣咁精神都唔會瞓得返,
响屋企玩到七點幾就帶咗佢落街市,
費事留响屋企同佢困獸鬥.
我未試過咁早落街市架,
有好多檔都未開.
可能上天想俾D補償我要咁早起身,
俾我發現有好多人圍住一檔從來都未見過嘅魚檔,
有好多平海鮮賣,
我即刻搶返兜蝦仔, 都係賣10蚊雞.
我諗呢檔野淨係開朝頭早, 賣完就收檔.
兜蝦仔本來諗住就咁烚熟佢食就算架喇,
我又忽發奇想, 不如整蝦餅吖
!咁就將D蝦去殼去腸:
想整粟米蝦餅, 但D粟米响冰箱,
我又唔知洗唔洗烚熟佢先, 時間所限,
剪D金菇碎落嚟, 整金菇蝦餅啦!
加D生粉調味攪呀攪到起膠, 有D似樣架!!
整好落鑊, 先醒起無落蛋白,
應該唔緊要吧!!
可能就係差緊D蛋白, 起初都成形架,
一反就散開晒了(又有可能我太心急反啦!)...
努力搶救無效, 唯有放棄.
蝦餅整不成, 變咗"蝦鬆"...
我仲硬著頭皮加多3隻蛋,
希望力挽狂瀾,
瞞天過海同大少講呢個係新菜式<蝦鬆炒蛋>
.
食咗幾啖嘅 <蝦鬆炒蛋>, 賣相實在慘不忍睹.
整蝦膠之時, 我仲用D蝦頭蝦殼滾咗個湯,
用來煮菠菜麵同烚菜...
本來我都有諗過烚多兩條腸仔俾大少做"後備"架!
不過, 有腸仔的話, 我碟<蝦鬆炒蛋>就唔洗旨意大少會食了...
好可惜, 我嘅如意算盤打唔響,
大少食咗幾啖就停手, 淨係食菜同麵!!
嗚嗚......其實碟<蝦鬆炒蛋>嘅味道唔差架,
仲好觧甜添! 不過個樣就......
兔寶寶: 媽咪我仲未食得蝦蝦架, 呢個新菜你自己慢慢吃啦!!
沒有留言:
張貼留言