三文治卷卷

11月27日 星期日 晴天

聽日係大少身份証上面嘅生日呀!
大家唔洗講生日快樂架,
因為佢個出生日期係假架!

海洋公園好好呀!
除咗一路都有嘅生日者免費之外,
今年當天生日果位仲可以為一位同伴以半價入場!
而兔寶寶未夠三嵗又係免費架嘛,
咁即係淨係俾我一個半份錢(即係佰四蚊)就可以一家人入埸玩喇!!
半價優惠去到出年八月尾咋!!

所以我地聽日會去海洋公園呀!
本著"你嘅錢即係我嘅錢, 我嘅錢都係我嘅錢"嘅精神,
我緊係唔會立亂洗大少d錢啦!
入面連麥當奴都貴過人架嘛!
除咗帶定水同汽水之外,
我仲準備咗一盒三文治卷卷呀!!

個卷卷係用咗火腿芝士同埋吞拿魚做餡料,
上面一盒已經用咗六塊麥包整架喇!
應該夠食掛?!

哈, 好似小學生去旅行咁,
早知買埋材料整菠蘿腸仔啦!!

兔寶寶係咪知道聽日去海洋公園心情特別興奮呢?
佢成點鐘先瞓得著呀!!

兔寶寶: 你地大人瞓, 我都唔瞓, 我bu!!