三色椒吞拿魚火腿薄餅(免搓餅底)

5月26日  星期六  時晴時雨

今朝好大雨呀! 我落去街市一陣間就由頭濕到落腳,
有傘都濕呀!
如果唔係要買D青紅黃椒整Pizza, 我先唔會咁大雨走落街!

跟T&P嘅免搓包食譜, 兩日之前已經整定兩盒餅底,
唔多夠高筋粉我又唔想剪開另一包用果少少, 所以加咗D全麥粉塡夠數.
用叉吉D窿窿等塊餅底更脆, 用保鮮紙蓋面包可以碌得更薄.


塗上吞拿魚醬(可以用意粉醬, 千島醬, 甚至茄汁...)然後醒15分鐘, 這時可順道預熱焗爐210度,
以及準備餡料.

今次我用青紅黃椒粒和火腿.
鋪上餡料後放入焗爐焗18分鐘, 又或者餅底焗到變金黃色.

取出並加上芝士, 再放入焗爐焗多兩至三分鐘.

我用mozzarella芝士碎,响廣東道尾(近官涌街市)一間叫安格斯嘅凍肉鋪買, 廿蚊有200克,
買返嚟放冰箱可以擺好耐架!
果度仲有好多羊架呀、鵝肝呀、刺身同世界各地嘅醬料賣,
平過 City Papa好多架!


出爐喇!!

餅底好薄唔怕食滯, 大少咁怕漏都食咗三件(即係一半).
自己整材料一定豐富, 仲可以落幾多芝士都得!

不過我忘記了餅底本身都咸,
塗得太多吞拿魚醬, 火腿又落多咗,
食食吓覺得咸了少許.
今次我用260克麵份對大約2/3茶匙鹽, 都係太咸,
下次整餅底要再落少D鹽了.

食完pizza洗好晒碗, 太陽出來了!
又可以帶兔寶寶坐單車喇!